Ngjarja tragjike e 25-vjeçares Xhuana Nikollaj ka tronditur opinionin publik dhe ka rikthyer në vëmendje një problem serioz të shoqërisë, dhunën në marrëdhënie. E reja humbi jetën pasi konsumoi fotoksinë, një vendim ekstrem që, sipas raportimeve, erdhi pas një periudhe të vështirë në marrëdhënien me partnerin e saj, Eraldo Fizi.
Kjo histori nuk shihet vetëm si një tragjedi personale, por edhe si një alarm për shoqërinë. Pas ngjarjeve të tilla shpesh fshihet një zinxhir i gjatë dhimbjeje, konfliktesh në marrëdhënie, dhune psikologjike apo fizike, izolimi emocional dhe ndjenja se askush nuk të dëgjon.
Specialistët theksojnë se dhuna në marrëdhënie nuk fillon gjithmonë me agresion fizik. Shpesh ajo nis me kontroll, fjalë poshtëruese, xhelozi të tepruar dhe presion psikologjik, derisa viktima humbet besimin tek vetja dhe fillon të ndiejë se nuk ka rrugëdalje.
Familja dhe shoqëria kanë një rol të rëndësishëm në këto raste. Të rinjtë shpesh hezitojnë të flasin për problemet nga frika e paragjykimit, ndaj është e rëndësishme që prindërit të krijojnë një ambient ku fëmijët ndihen të sigurt për të ndarë shqetësimet e tyre.
Sapo kaloi 8 marsi dita e ndërgjisimit të gruas, kjo tragjedi shërben si një kujtesë e dhimbshme se siguria dhe respekti ndaj grave nuk duhet të jenë vetëm një simbolikë feste, por një angazhim i përditshëm i gjithë shoqërisë.
Nuk e di edhe sa gra dhe vajza duhet të humbasin jetën që shoqëria jonë të ngrejë zërin dhe të protestojë, në mënyrë që dhunuesit të marrin dënimin e merituar. Vajza, flisni dhe kërkoni ndihmë përpara se ta gjeni veten përballë një dhome të errët, me helm në duar dhe pa asnjë dëshirë për të jetuar. Heshtja nuk është zgjidhje. Zëri juaj mund të shpëtojë jetën tuaj. Prindër, nuk është turp që vajza juaj të ndahet nga një marrëdhënie që e lëndon. Turp është që fëmija juaj të vuajë çdo ditë dhe ju të mos bëni asgjë nga frika e fjalëve të shoqërisë. Jeta dhe siguria e saj vlejnë më shumë se çdo paragjykim.
