Një tërmet me magnitudë 4.8 të shkallës Richter është regjistruar mbrëmjen e së martës në Kosovë, duke shkaktuar panik te qytetarët në disa zona të vendit. Sipas të dhënave sizmologjike, lëkundja ka ndodhur në orën 22:05, në një thellësi rreth 10 kilometra, ndërsa epiqendra është lokalizuar në zonën e Shtërpcës. Tërmeti është ndier në pjesën më të madhe të territorit, përfshirë edhe kryeqytetin.
Deri më tani, nuk raportohen dëme materiale apo persona të lënduar, ndërsa institucionet përkatëse po e monitorojnë situatën. Komuna e Prishtinës, përmes një njoftimi në rrjetet sociale, u ka bërë thirrje qytetarëve të tregojnë kujdes gjatë lëkundjeve, duke rekomanduar që të qëndrojnë larg dritareve dhe objekteve që mund të bien, si dhe të strehohen nën tavolina të forta ose pranë mureve mbajtëse.
Sizmologu Shemsi Mustafa ka theksuar se magnituda e tërmetit kishte potencial për të shkaktuar dëme, duke qenë se lëkundja ishte e fortë dhe me thellësi të cekët. Kosova bën pjesë në brezin sizmik të Ballkanit dhe konsiderohet zonë me aktivitet sizmik të moderuar. Lëkundjet janë zakonisht me magnitudë të ulët ose mesatare, por ndihen shpesh për shkak të thellësisë së vogël të epiqendrave, veçanërisht në juglindje dhe jugperëndim të vendit, si Shtërpca, Prizreni dhe Peja.
