Aktorja Anila Bisha ka nisur një betejë ligjore ndaj Këshillit të Ministrave, AKSHI-t dhe kompanisë përkatëse, duke pretenduar se imazhi i saj është përdorur pa të drejtë në krijimin e asistentes virtuale “Diella”.
Në padinë e dorëzuar në Gjykatën Administrative, Bisha kërkon pezullimin e menjëhershëm të përdorimit të figurës së “Diellës” deri në përfundimin e procesit gjyqësor. Sipas saj, pamja e asistentes virtuale përbën një rikrijim të avatarizuar të imazhit të saj personal. Aktorja argumenton se kontrata e mëparshme lejonte përdorimin e imazhit vetëm për një funksion të caktuar në platformën e-Albania dhe kishte afat të përcaktuar, duke mos përfshirë përdorime të tjera publike apo identitete të reja.
Rasti pritet të shqyrtohet nga Gjykata Administrative dhe ka rikthyer në vëmendje diskutimin mbi të drejtat e imazhit dhe kufijtë ligjorë të përdorimit të figurave në projektet digjitale.
