Edhe pse kanë mbetur ende disa muaj deri tek eventi më i madh i modës, organizatorët kanë zbuluar zyrtarisht kodin e veshjes për edicionin 2026: “Fashion is Art”.
Tema e ekspozitës në Costume Institute pranë Metropolitan Museum of Art ishte bërë e ditur më herët si “Costume Art”, por tashmë dress code-i konfirmon qartë drejtimin kreativ që do të ndjekin të ftuarit.
“Fashion is Art” fton për një reflektim të thellë mbi marrëdhënien mes modës dhe artit, dy disiplina që historikisht kanë ndikuar dhe frymëzuar njëra-tjetrën. Kjo do të thotë se në tapetin e kuq pritet të shohim krijime që tejkalojnë kufijtë e veshjes tradicionale, duke u kthyer në instalacione artistike të vërteta. Si çdo vit, eventi do të mbahet të hënën e parë të majit në New York, dhe fansat e modës tashmë kanë nisur të fantazojnë për silueta dramatike, struktura skulpturore dhe referenca ndaj pikturës, arkitekturës apo artit modern. Një gjë është e sigurt, Met Gala 2026 premton spektakël vizual dhe momente ikonike në tapetin e kuq.
