Dua Lipa vijon të shkruajë historinë në industrinë muzikore globale, duke arritur një tjetër rekord të jashtëzakonshëm në Spotify. Albumi i saj debutues, Dua Lipa, ka tejkaluar shifrën e 15 miliardë dëgjimeve, duke e bërë këngëtaren shqiptare gruan e parë në histori që ka dy albume mbi këtë prag.
Ky sukses vjen pas arritjes së mëparshme me Future Nostalgia, i cili gjithashtu ka kaluar këtë shifër, duke e vendosur artisten në një elitë të rrallë të muzikës botërore. Me këtë rekord, Dua Lipa lë pas emra të njohur të skenës ndërkombëtare si Olivia Rodrigo dhe SZA, duke konfirmuar ndikimin e saj të jashtëzakonshëm në epokën e streaming. I publikuar në vitin 2017, albumi debutues shënoi hyrjen e saj të fuqishme në tregun global, me hite si New Rules, IDGAF dhe Be the One. Suksesi i tij u zgjat edhe më tej me versionin “Complete Edition”, që përfshinte bashkëpunime si One Kiss dhe Electricity.
Përveç suksesit komercial, albumi u vlerësua edhe nga kritika, duke i siguruar artistes nominime prestigjioze dhe duke kontribuar në fitimin e çmimit Grammy Awards për “Artistja më e mirë e re”. Ky rekord i ri dëshmon jo vetëm popullaritetin e Dua Lipa, por edhe fuqinë e katalogut të saj muzikor, i cili vazhdon të dominojë platformat digjitale në mbarë botën.
