Një histori e rëndë kriminale, e nisur më shumë se dy dekada më parë në Lushnjë, ka marrë një kthesë të re. Dy vëllezërit Artur dhe Arben Mëhilli janë arrestuar në Itali, pas 25 vitesh në arrati, si të dënuar për një vrasje të ndodhur në vitin 1999.
Sipas autoriteteve, ata ishin shpallur në kërkim ndërkombëtar pasi në vitin 2001 u dënuan në mungesë nga Gjykata e Lushnjës me 32 vite burg në total për vrasjen e Rezar Metajt. Krimi ishte motivuar nga hakmarrja, pasi në vitin 1997 viktima kishte vrarë vëllanë e tyre, Sokol Mëhillin. Pas ngjarjes, dy vëllezërit u arratisën drejt Italisë, ku jetuan për vite me identitete të rreme, duke përdorur emrat Artur Davidhi dhe Arben Gjermeni. Ata arritën të ndërtonin një jetë të re, madje duke siguruar edhe dokumente qëndrimi në shtetin fqinj.
Zbulimi i tyre u bë i mundur falë bashkëpunimit mes autoriteteve shqiptare dhe italiane, si dhe përdorimit të teknologjisë së avancuar të identifikimit, si “facial recognition”, që krahasoi fotografi të vjetra me imazhet aktuale të të dyshuarve. Artur Mëhilli, i cili ishte 33 vjeç në kohën e krimit, u arrestua në moshën 60-vjeçare, ndërsa vëllai i tij Arbeni, që ishte 27 vjeç në atë kohë, u vu në pranga në moshën 54-vjeçare.
Rasti merr një tjetër dimension për shkak të lidhjes familjare me Stenaldo Mëhilli, i njohur për pjesëmarrjen në Big Brother VIP Albania. Viktima e vitit 1997, Sokol Mëhilli, ishte babai i tij, një ngjarje që gazetari e ka rrëfyer publikisht, duke treguar se ishte vetëm një muajsh kur ndodhi tragjedia. Aktualisht, autoritetet e Shqipëri dhe Itali janë në proces bashkëpunimi për ekstradimin e dy vëllezërve, në mënyrë që ata të vuajnë dënimin e dhënë nga drejtësia shqiptare.
