Këngëtarja shqiptare me famë ndërkombëtare, Bebe Rexha, është vlerësuar së fundmi me çmimin prestigjioz “Female Icon Award 2026” nga EDM Awards, duke konfirmuar edhe një herë ndikimin e saj të madh në muzikën dance globale.
Artistja ka ndarë emocionet e saj përmes një videoje në Instagram, ku shfaqet duke marrë trofeun dhe falënderon fansat dhe komunitetin e muzikës elektronike për mbështetjen e vazhdueshme. “Wow, faleminderit EDMAs. Kjo është e pabesueshme… Muzika dance ka qenë gjithmonë arratisja dhe terapia ime,” u shpreh ajo, duke theksuar lidhjen e fortë që ka me këtë zhanër. Rexha nuk harroi të promovojë edhe projektin e saj më të ri, këngën New Religion, në bashkëpunim me grupin legjendar Faithless, e cila tashmë është publikuar.
Vitet e fundit, këngëtarja ka qenë shumë aktive në skenën e muzikës elektronike dhe euro-dance, duke sjellë hite globale si I’m Good (Blue) dhe One in a Million, që kanë dominuar top-listat ndërkombëtare. Ky çmim shënon një tjetër sukses të rëndësishëm në karrierën e saj, duke e pozicionuar Bebe Rexha si një nga figurat më të rëndësishme të muzikës dance në botë.
