Këngëtarja Vesa Luma ka reaguar në rrjetet sociale me një mesazh të fortë, duke ngritur sërish debat mbi të drejtat autoriale në muzikë. Në një InstaStory, ajo ndau një lajm që lidhej me pretendimet për kopjimin e këngës “Valle Kosovare” të Shpat Kasapi nga një artist bullgar, por mesazhi i saj nuk u ndal vetëm aty.
Në shkrimin e publikuar, Vesa theksoi rëndësinë e mbrojtjes së krijimeve artistike, duke paralajmëruar se pa kontrata të qarta, puna e artistëve mund të përfundojë duke u shfrytëzuar nga të tjerët. Në fund të mesazhit, ajo bëri edhe një thumb të drejtpërdrejtë për situatën e fundit mes Tayna-s dhe Alida Hisku. “Është shumë e rëndësishme e drejta autoriale… sepse një ditë, kur nuk jemi më, përfitojnë të tjerët nga mundi yt. Ose kur të plakeni, ju blen ndonjë artist i momentit me 250 euro,” shkroi ajo.
Deklarata lidhet me intervistën e fundit të Alida Hiskut, e cila tregoi se për përdorimin e zërit dhe vargjeve nga kënga e saj “Vajzat e fshatit tim” në projektin “Thana”, kishte marrë 250 euro. Kjo çështje ka hapur debat të madh online për pagesat, kontratat dhe respektimin e të drejtave të autorit në industrinë muzikore shqiptare.
