Një studim i publikuar në vitin 2015 nga Drexel University në revistën shkencore Appetite sugjeron se gjendja fizike, si uria apo ngopja, mund të ndikojë në mënyrën se si gratë reagojnë ndaj romancës.
Sipas kërkimit, gratë treguan aktivitet më të lartë në zonat e trurit që lidhen me shpërblimin dhe kënaqësinë kur ishin të ngopura, krahasuar me momentet kur ishin të uritura. Kjo do të thotë se ato ishin më të ndjeshme ndaj imazheve dhe stimujve romantikë pas konsumimit të ushqimit. Studiuesit theksojnë se faktorë bazë fiziologjikë, si uria, mund të ndikojnë drejtpërdrejt në reagimet emocionale dhe sociale të individëve. Në këtë rast, ngopja duket se rrit hapjen ndaj ndjenjave pozitive dhe lidhjeve romantike.
Megjithatë, ekspertët theksojnë se këto rezultate nuk duhet të përgjithësohen për çdo situatë, por tregojnë se si trupi dhe emocionet janë të lidhura ngushtë në mënyrën se si përjetojmë marrëdhëniet dhe tërheqjen.
