Sharon Stone ka ndarë një nga historitë më të dhimbshme të jetës së saj, duke folur hapur për përpjekjet e dështuara për të pasur fëmijë biologjikë.
Në një intervistë për Paris Match, aktorja zbuloi se ka përjetuar nëntë aborte spontane, pesë prej të cilave në muajin e pestë të shtatzënisë. Ajo theksoi se për shumë gra kjo mbetet një dhimbje e heshtur, pasi shpesh ndihen të detyruara ta përjetojnë në privatësi, sikur të ishte një dështim personal.
Sipas saj, një nga arsyet lidhet me faktorin Rh, një veçori e gjakut që mund të krijojë komplikime gjatë shtatzënisë kur nëna dhe fetusi kanë përputhje të ndryshme. Në raste të tilla, organizmi i nënës mund të reagojë duke krijuar antitrupa që ndikojnë te fetusi. Pavarësisht sfidave, Stone zgjodhi rrugën e adoptimit dhe sot është nënë e tre djemve: Roan, Laird dhe Quinn. Rrëfimi i saj vjen si një mesazh i fortë për të gjitha gratë që kanë kaluar të njëjtën përvojë, duke i inkurajuar të flasin hapur dhe të mos ndihen vetëm.
