Tensionet mes Pakistanit dhe qeverisë talebane të Afganistanit janë përshkallëzuar në një konflikt të hapur. Ministri i Mbrojtjes i Pakistanit, Khawaja Asif, deklaroi se tashmë vendi i tij po përballet me një “luftë të hapur”, ndërsa raportohen shpërthime në Kabul dhe luftime përgjatë kufirit të përbashkët.
Zëdhënësi i talebanëve, Zabihullah Mujahid, tha se Afganistani po kryen “operacione ofensive në shkallë të gjerë” ndaj forcave pakistaneze përgjatë Vijës Durand, duke pretenduar se dhjetëra persona kanë humbur jetën.
Ministria e Mbrojtjes e Afganistanit raportoi se përleshjet zgjatën rreth katër orë dhe përfshinë përdorimin e armëve të lehta dhe të mesme, ndërsa operacioni u ndërpre në mesnatë sipas urdhrit të shefit të shtabit afgan. Sipas pretendimeve të të dyja palëve, humbjet ishin të mëdha: Afganistani raporton 55 ushtarë pakistanezë të vrarë dhe tetë talebanë të vdekur, ndërsa Pakistani pretendon se ka vrarë 133 luftëtarë talebanë dhe ka humbur dy nga pjesëtarët e tij të sigurisë. Komuniteti ndërkombëtar po bën thirrje për përmbajtje dhe dialog mes palëve për të shmangur përshkallëzimin e mëtejshëm.
