Epilepsia po shndërrohet në një nga shqetësimet më serioze të shëndetit publik në Shqipëri. Të dhënat tregojnë se vendi ynë ka një incidencë më të lartë të kësaj sëmundjeje krahasuar me vendet e rajonit, duke prekur gjithnjë e më shumë qytetarë të grupmoshave të ndryshme.
Sipas statistikave, rreth 5 nga 1000 banorë në Shqipëri vuajnë nga krizat epileptike. Ajo që shqetëson më shumë mjekët është fakti se rastet janë në rritje, sidomos tek të rinjtë dhe fëmijët, por edhe tek moshat e treta.
Mjekja neurologe e QSUT-së, Aida Quka, thekson se epilepsia prek kryesisht të rinjtë dhe të moshuarit, ndërsa një nga faktorët kryesorë që po ndikon në rritjen e rasteve tek të rinjtë është përdorimi i substancave narkotike. Ajo nënvizon se jo çdo dridhje apo humbje ndjenje përbën domosdoshmërisht epilepsi, ndaj diagnostikimi i saktë është thelbësor.
Në kuadër të Ditës Ndërkombëtare të Epilepsisë, mjekët bëjnë thirrje për ndërgjegjësim, diagnozë të hershme dhe trajtim të rregullt. Ata theksojnë gjithashtu se personat që vuajnë nga epilepsia përballen shpesh me stigmë dhe paragjykime, të cilat çojnë në humbje të vendeve të punës apo përjashtim nga arsimi.
Specialistët apelojnë që epilepsia të trajtohet si çdo sëmundje tjetër, pa diskriminim, pasi mbështetja dhe trajtimi në kohë përmirësojnë ndjeshëm cilësinë e jetës së pacientëve dhe ulin ndikimin e saj në shoqëri.
