Një situatë alarmante po raportohet në Dubai, ku shumë banorë që po largohen nga qyteti për shkak të tensioneve në rajon po lënë pas kafshët e tyre shtëpiake.
Sipas raportimeve nga strehimore, klinika veterinare dhe grupe vullnetare, është rritur ndjeshëm numri i kërkesave për ndihmë. Disa pronarë po kërkojnë të gjejnë familje të reja për qentë dhe macet e tyre, ndërsa të tjerë po kontaktojnë klinikat veterinare për të kërkuar eutanazinë e tyre.
Vullnetarët tregojnë se ka edhe raste kur kafshët janë braktisur në rrugë, janë lënë në pragjet e shtëpive të panjohura apo edhe brenda banesave të mbyllura, pa mundësi për të mbijetuar.
Një nga arsyet kryesore të këtij fenomeni lidhet me procedurat burokratike që e bëjnë të vështirë nxjerrjen e kafshëve jashtë vendit. Rregulloret shëndetësore kërkojnë vaksina dhe certifikata të ndryshme, procese që shpesh marrin kohë dhe nuk mund të përfundojnë në raste largimi urgjent.
Organizatat për mbrojtjen e kafshëve po bëjnë thirrje për birësime urgjente dhe për përgjegjësi nga pronarët, duke theksuar se shumë prej këtyre kafshëve janë të moshuara, të regjistruara dhe me mikroçip, çka tregon se dikur kanë jetuar në familje që tani janë larguar papritur.
Për vullnetarët, këto kafshë janë bërë viktimat e heshtura të krizës, të lëna pas në një qytet që po përballet me pasiguri dhe largime të shumta.
