Mbrëmja e fundit në Big Brother VIP Albania solli një nga momentet më të veçanta të këtij sezoni, teksa Brikena dhe Mateo organizuan një ceremoni simbolike martese brenda shtëpisë.
Atmosfera romantike dhe emocionet e forta e kthyen këtë moment në një nga më të komentuarit, duke pushtuar menjëherë rrjetet sociale. Publiku reagoi masivisht, ndërsa pamjet nga ceremonia u shpërndanë me shpejtësi të madhe. Ajo që e bëri edhe më të veçantë këtë ngjarje ishte jehona ndërkombëtare. Videot e Brikenës e veshur me fustanin e nusërisë u bënë virale në platforma si TikTok, duke kaluar kufijtë shqiptarë dhe duke u shpërndarë gjerësisht në vende të Azisë, përfshirë Thailand. Shumë faqe dhe përdorues të huaj reaguan me entuziazëm, duke e etiketuar atë si “Miss Grand Kosovo”, një titull që lidhet me pjesëmarrjen e saj në një nga kompeticionet ndërkombëtare të bukurisë vitin e kaluar.
Interesimi nuk mungoi as nga figura publike. Në rrjetet sociale, ndër mijëra pëlqime në postimin e çiftit, u vu re edhe reagimi i modeles meksikane Valentina Cruzs. Kjo vëmendje e madhe ndërkombëtare konfirmon edhe një herë ndikimin që formatet si BBVIP mund të kenë përtej kufijve, duke e kthyer një moment televiziv në një fenomen global.
