Miley Cyrus do të rikthehet simbolikisht te roli që e bëri të famshme në mbarë botën, në kuadër të 20-vjetorit të serialit ikonik Hannah Montana. Lajmi është konfirmuar nga Disney, i cili ka paralajmëruar realizimin e një episodi special festiv.
Programi do të xhirohet para një audience live dhe do të sjellë një rrëfim më personal të artistes për ndikimin që pati personazhi në jetën dhe karrierën e saj. Pjesë e specialit do të jetë edhe një intervistë me Alex Cooper, prezantuesen e podcastit Call Her Daddy. Gjatë episodit do të rikrijohen disa nga ambientet më të njohura të serialit dhe do të transmetohen pamje të rralla nga prapaskenat. Vetë Cyrus u shpreh se personazhi do të mbetet gjithmonë pjesë e identitetit të saj, duke e cilësuar projektin si një mënyrë për të falënderuar fansat për mbështetjen ndër vite.
Speciali pritet të publikohet në platformën Disney+ më 24 mars, duke sjellë nostalgji për një brez të tërë që u rrit me historinë e adoleshentes me jetë të dyfishtë, nxënëse e zakonshme dhe yll popi njëkohësisht.
