Një deklaratë e bërë gjatë transmetimit të Ferma VIP ka shkaktuar reagime të forta publike dhe institucionale. Moderatorja Arbana Osmani u vu në qendër të kritikave pas përdorimit të një shprehjeje të cilësuar si fyese dhe me ngarkesë diskriminuese ndaj komunitetit egjiptian. “Merr flakë si pushka jevgut”- tha moderatorja në primen e mbrëshmëm. Organizata të ndryshme për të drejtat e njeriut, përfshirë Lëvizjen Rinore Egjiptiane dhe Rome, reaguan duke theksuar se përdorimi i shprehjeve të tilla, edhe kur nuk kanë qëllim të drejtpërdrejtë ofendues, ushqen stereotipe dhe paragjykime që ndikojnë negativisht në shoqëri.
Sipas tyre, pjesëtarë të komunitetit janë ndjerë të prekur dhe kanë kërkuar një ndjesë publike më të qartë dhe të drejtpërdrejtë nga moderatorja. Reagimi i mëvonshëm i Arbanës nuk është konsideruar i mjaftueshëm nga këto organizata. Në të njëjtën linjë, edhe organizata të tjera si Qendra për Advokim Social dhe Drejtësi Sociale e kanë cilësuar shprehjen problematike, duke nënvizuar se fraza të tilla nuk duhet të normalizohen si “shprehje popullore”, pasi mbartin histori paragjykimi dhe përjashtimi. Reagim ka ardhur gjithashtu nga Komisioneri për Mbrojtjen nga Diskriminimi, i cili dënoi përdorimin e gjuhës së papërshtatshme në transmetim dhe theksoi se media ka përgjegjësi për të promovuar barazi dhe respekt për dinjitetin e çdo individi.
Institucioni u bëri thirrje produksionit dhe televizionit që të marrin masa konkrete për të parandaluar raste të ngjashme në të ardhmen, duke vendosur mekanizma që sigurojnë një komunikim më gjithëpërfshirës në ekran. Ky rast ka hapur një debat të gjerë publik mbi rolin e medias, përgjegjësinë e figurave publike dhe kufijtë e gjuhës së pranueshme, sidomos në programe me audiencë të lartë.
