Në Samitin e Diasporës që po zhvillohet në Tiranë më 14 prill, ish-kryetari i Bashkisë së New York-ut, Eric Adams, ishte një nga figurat e ftuara në skenë nga kryeministri Edi Rama.
Gjatë momentit simbolik në aktivitet, Rama i vendosi Adams-it një plis në kokë dhe i dorëzoi pasaportën si dhe kartën e identitetit shqiptar, duke e bërë pjesë zyrtare të shtetësisë shqiptare. “Kjo është bota kur kthehet përmbys”, u shpreh Rama me batutë, duke shtuar se dikur askush nuk do ta kishte menduar që kryebashkiaku i New York-ut do të bëhej qytetar i Shqipërisë.
Në fjalën e tij, Adams vlerësoi diasporën shqiptare dhe rolin e saj në botë, duke falënderuar kryeministrin Rama për mikpritjen dhe nderin e dhënë. Ai theksoi se ka qenë gjithmonë i impresionuar nga komuniteti shqiptar në SHBA dhe energjia e tij.
“Unë nuk kam pasur nevojë për video për të njohur historinë tuaj. E kam parë nga afër shpirtin e diasporës shqiptare në rrugët e New York-ut. Ju mund të keni lënë vendin, por vendi nuk ju ka lënë kurrë ju. Unë e dua Amerikën, por sot, falë kryeministrit Rama, unë jam shqiptar”, deklaroi Adams. Ish-kryebashkiaku i New York-ut ka marrë zyrtarisht nënshtetësinë shqiptare më 10 prill, vendim i publikuar në Fletoren Zyrtare dhe i firmosur nga Presidenti i Republikës, Bajram Begaj.
