Meksika po kalon një nga momentet më të tensionuara të viteve të fundit, pasi forcat e sigurisë eliminuan Nemesio Rubén Oseguera Cervantes, i njohur si “El Mencho”, liderin e kartelit famëkeq Jalisco New Generation Cartel. Vetëm pak orë pas njoftimit për vdekjen e tij, shpërthyen përleshje të armatosura, u dogjën automjete dhe u bllokuan rrugë kryesore, duke e kthyer perëndimin e Meksika në një zonë kaosi.
Operacioni ushtarak u zhvillua më 22 shkurt në rajonin e Jalisco, një bastion historik i kartelit. Sipas autoriteteve, objektivi ishte kapja e tij, por gjatë shkëmbimit të zjarrit ai mbeti i plagosur rëndë dhe ndërroi jetë gjatë transportit me helikopter drejt kryeqytetit. Në operacion u vranë edhe katër anëtarë të kartelit, ndërsa disa ushtarakë mbetën të plagosur. Lajmi për vrasjen ndezi menjëherë një valë hakmarrjeje. Grupe të armatosura ngritën qindra postblloqe, dogjën kamionë dhe autobusë, si dhe sulmuan banka e biznese në disa shtete të vendit. Situata ishte veçanërisht e rëndë në qytetin e Guadalajara, ku dëshmitarët raportuan të shtëna dhe re të mëdha tymi mbi zona urbane. Panik u regjistrua edhe në aeroporte, ku fluturimet u pezulluan dhe pasagjerët u evakuuan për arsye sigurie. Autoritetet lokale shpallën kodin e kuq, pezulluan transportin publik dhe mbyllën shkollat, ndërsa forcat federale u vendosën në pika strategjike për të rimarrë kontrollin.
“El Mencho”, një ish-polic që u shndërrua në një nga figurat më të fuqishme të krimit në Amerikën Latine, konsiderohej prej vitesh ndër trafikantët më të rrezikshëm në botë. Eliminimi i tij shihet si një goditje e madhe për kartelin, por ekspertët paralajmërojnë se boshllëku i krijuar mund të sjellë përplasje të reja për pushtet dhe një valë tjetër dhune në vend.
