Fituesi i Big Brother VIP Albania, Gjesti, u përball ditët e fundit me një situatë të tensionuar ligjore, pas arrestimit për dyshimet e kryerjes së veprave penale Kanosja, Asgjësim apo dëmtim i pasurisë dhe Mbajtja e armëve pa leje. Por sipas avokatit të tij, Burim Azemi, pjesa më problematike lidhet me kontratën e tij me kompaninë muzikore Onima.
Kontrata e distribucionit e nënshkruar në qershor 2023 ishte për dy vite, deri në qershor 2025. Ajo mund të mos vazhdohej automatikisht, nëse njoftimi dorëzohej 90 ditë para skadimit. Gjesti dhe familja e tij kishin informuar zyrtarisht kompaninë për mosvazhdimin, por kontrata u rinovua pa miratimin e tij,- tha avokati. Azemi theksoi se artistit i ishte pamundësuar të dorëzonte njoftimin për shkak të angazhimeve në Big Brother, por kjo nuk e ka penguar Onima-n që ta konsiderojë kontratën të vazhduar.
Gjesti u lirua nga paraburgimi më 19 mars, në një ditë me ngarkesë emocionale, ditëlindjen e vëllait të tij të ndjerë. Ai tashmë mund të kthehet tek aktiviteti artistik, ndërsa çështja ligjore pritet të marrë rrugën e saj në gjykatë. Ngjarja ka ngjallur diskutime të shumta në publik, duke risjellë në vëmendje marrëdhëniet e ndërlikuara mes artistëve dhe kompanive muzikore, si dhe të drejtat e tyre kontraktuale.
