Ikona e kinemasë Meryl Streep po tërheq vëmendjen jo vetëm për rikthimin e saj në filmin The Devil Wears Prada 2, por edhe për një paraqitje që është kthyer në një homazh të pastër ndaj historisë së modës.
Në një nga skenat më të komentuara, ajo shfaqet me një fustan të kuq spektakolar, i dizenjuar nga Pierpaolo Piccioli, që duket sikur dialogon drejtpërdrejt me trashëgiminë e Cristóbal Balenciaga. Krijimi rikthen në vëmendje ADN-në e shtëpisë së modës Balenciaga, e njohur për format e saj skulpturore dhe siluetat arkitekturore.
Në vitet ’50, Cristóbal Balenciaga revolucionarizoi couture-in duke përdorur tafetën e mëndafshit për të ndërtuar volume dramatike dhe struktura që sfidonin formën klasike të trupit. Ngjyra e kuqe, në vizionin e tij, ishte më shumë se një zgjedhje estetike, ishte një deklaratë force, pasioni dhe prezence.
Ky frymëzim historik duket se ringjallet në mënyrë moderne përmes këtij look-u, duke krijuar një urë mes së shkuarës dhe së tashmes. Referencat ndaj arkivave të revistës L’Officiel, veçanërisht kopertinat e viteve 1950–1951, e përforcojnë këtë lidhje, ku couture-i trajtohej si art skenografik. Me këtë paraqitje, Meryl Streep jo vetëm që rikthen në jetë një epokë të artë të modës, por dëshmon edhe një herë se stili i vërtetë është i përjetshëm.
