Britney Spears ka shitur të drejtat e të gjithë katalogut të saj muzikor kompanisë “Primary Wave” për rreth 200 milionë dollarë. Këngëtarja ikonike e pop-it, e njohur për hitet si “…Baby One More Time”, “Oops!… I Did It Again”, “Toxic” dhe “Gimme More”, ka qenë prej vitesh në qendër të vëmendjes edhe për shkak të kujdestarisë që ndikoi në jetën dhe karrierën e saj.
Në janar 2024, Spears deklaroi se nuk kishte ndërmend të rikthehej më në industrinë muzikore. Projekti i saj i fundit ishte dueti me Elton John në vitin 2022. “Primary Wave” ka blerë më herët të drejtat muzikore të artistëve legjendarë si Notorious BIG, Prince dhe Whitney Houston. Në vitet e fundit, edhe emra të mëdhenj si Bruce Springsteen, Justin Bieber, Justin Timberlake dhe Shakira kanë shitur katalogët e tyre muzikorë për shuma marramendëse.
Britney Spears mbetet një nga artistet femra më të shitura në histori, me mbi 150 milionë albume të shitura në mbarë botën dhe një katalog që përfshin nëntë albume studioje që prej debutimit të saj në vitin 1999.
