Një ngjarje e rëndë ka tronditur opinionin publik, pas vrasjes së 13-vjeçares shqiptare Aurora Tila në Piacenza, ndërsa detaje të reja nga hetimet hedhin dritë mbi momentet e fundit të saj. Sipas mediave italiane, bisedat që e mitura kishte zhvilluar me inteligjencën artificiale ChatGPT janë përfshirë si prova në procesin gjyqësor ndaj autorit, ish-të dashurit të saj, i cili është dënuar me 17 vite burg nga Gjykata e të Miturve në Bolonjë.
Ngjarja ndodhi më 25 tetor 2024, kur vajza humbi jetën pasi u shty nga ballkoni. Hetimet zbuluan se ajo kishte kërkuar ndihmë për të kuptuar marrëdhënien që po përjetonte, duke pyetur se si të dallonte dashurinë nga një lidhje toksike dhe nëse duhej t’i jepte fund asaj. Sipas gjykatës, marrëdhënia karakterizohej nga presion, përndjekje dhe xhelozi ekstreme. Frika e vazhdueshme e kishte shtyrë vajzën të pranonte takimin e fundit me autorin, në përpjekje për të qetësuar situatën.
Mesazhet e tij u konsideruan manipuluese dhe kërcënuese, ndërsa një ditë para ngjarjes ai kishte shprehur qëllimin për ta vrarë. Edhe pse fillimisht pretendoi se ishte aksident, provat dhe dëshmitë e rrëzuan këtë version. Rasti ka hapur një debat të gjerë mbi dhunën në marrëdhëniet e të rinjve dhe mënyrën se si ata kërkojnë ndihmë, duke treguar edhe një herë se shenjat e një lidhjeje të rrezikshme shpesh neglizhohen deri në pasoja tragjike.
