Një operacion i gjerë antidrogë në Stamboll ka vënë në shënjestër disa nga figurat më të njohura të showbiz-it dhe biznesit turk, duke shkaktuar reagime të shumta në opinionin publik.
Hetimi, i udhëhequr nga Prokuroria Publike, ka çuar në lëshimin e urdhër-arresteve për 16 persona, të dyshuar për përfshirje në aktivitete të paligjshme.
Mes emrave të përmendur është edhe aktorja e njohur Hande Erçel, së bashku me biznesmenin Hakan Sabancı dhe vëllain e tij Kerim Sabancı. Në listë përfshihen gjithashtu modelja Didem Soydan, Güzide Duran, si dhe ish-drejtues klubesh sportive si Fikret Orman dhe Burak Elmas.
Autoritetet po hetojnë një sërë akuzash që lidhen me prodhimin dhe shpërndarjen e drogës, përdorimin e saj, si dhe dyshime për përfshirje në rrjete prostitucioni. Operacioni është zhvilluar njëkohësisht në disa adresa, ndërsa disa prej të dyshuarve janë ndaluar dhe të tjerë rezultojnë jashtë vendit.
Ndërkohë, Hande Erçel ka reaguar publikisht, duke deklaruar se ka mësuar për hetimin përmes mediave dhe se do të rikthehet në Turqi për të dhënë sqarimet e saj para drejtësisë. Ajo ka shprehur besimin se e vërteta do të dalë në dritë.
Ngjarja ka tronditur industrinë e argëtimit në Turqi, ndërsa pritet që zhvillimet e mëtejshme të hedhin më shumë dritë mbi këtë çështje.
