Një vendim i marrë mijëra vite më parë vazhdon të ndikojë drejtpërdrejt në jetën tonë të përditshme: mënyra si e masim kohën. Edhe pse sot jetojmë në një botë moderne dhe teknologjike, sistemi me 24 orë në ditë dhe 60 minuta në orë ka rrënjë që shkojnë deri te qytetërimet e para njerëzore.
Një nga përpjekjet më të famshme për ta ndryshuar këtë sistem ndodhi gjatë Revolucioni Francez. Në vitin 1793, Franca vendosi të eksperimentonte me kohën dhjetor” dita do të kishte 10 orë, çdo orë 100 minuta dhe çdo minutë 100 sekonda. Ky sistem ishte pjesë e një reforme më të gjerë për të racionalizuar jetën dhe për t’u shkëputur nga traditat e vjetra. Megjithatë, ky eksperiment dështoi shpejt. Sistemi i ri ishte i vështirë për t’u përdorur, krijonte konfuzion dhe e izolonte Francën nga pjesa tjetër e botës. Për më tepër, ndryshimi i ritmit të jetës si p.sh. java me 10 ditë, nuk u pranua nga popullsia. Pas pak më shumë se një viti, koha dhjetore u braktis.
Por origjina e sistemit aktual është shumë më e lashtë. Rreth 5,000 vite më parë, sumerët në Mesopotami zhvilluan një sistem numerik të bazuar në numrin 60, i njohur si sistemi seksagesimal. Ky sistem ishte praktik, pasi numri 60 pjesëtohet lehtësisht me shumë numra (2, 3, 4, 5, 6, 10, 12), duke e bërë ideal për llogaritje matematikore dhe astronomike. Një teori interesante lidhet me mënyrën e numërimit me gishta: duke përdorur nyjet e gishtave të një dore mund të numërosh deri në 12, dhe duke e përsëritur këtë proces me dorën tjetër arrin në 60. Kjo e bënte sistemin intuitiv dhe të lehtë për përdorim në jetën e përditshme.
Ndërkohë, egjiptianët e lashtë hodhën bazat për ndarjen e ditës në 24 orë, duke e ndarë atë në 12 orë për ditën dhe 12 për natën. Ata përdorën mjete si orët diellore dhe ato me ujë për të matur kohën, duke krijuar një strukturë që përdoret ende sot. Më pas, babilonasit e zhvilluan më tej këtë sistem, duke ndarë orën në minuta dhe sekonda, gjithashtu të bazuara në numrin 60. Kështu lindi formati që njohim sot, 24 orë në ditë, 60 minuta në orë dhe 60 sekonda në minutë.
